ဆရာခင်ဇော်မြင့် ရဲ့ ကဗျာ -၅-ပုဒ် ဖြစ်ပါတယ်]
__________________________________
``တန့်ကြည့်တောင်´´
ဇာတ်လမ်းအရ
တောနှင့်တောင်က အချိတ်အဆက်မမိလေတော့
စကားဝါပင်လို တိတ်တိတ်ကြွေနေရကြောင်း
ချိတ်ဆွဲထားတဲ့ခေါင်းလောင်းလို တိတ်တိတ်နေရကြောင်း
မြစ်မင်းကို မှန်ထောင်ပြမိတယ် ။
ရင်ပြင်တော်မှာ
ကလေးလေးတွေက လေယာဉ်ပျံရှပ်ထိုးကစားလို့။
အစီအစဉ်အရ
နေရောင်က ငါးတစ်ကောင်ကို ဆလိုက်ထိုးမပြတော့
စိတ်နဲ့
စေတီဟောင်းကို ထုံးဖြူဖြူသုတ်ပြီးကြောင်း
ခြေတော်ရာကို ရွှေအတိချပြီးကြောင်း
မြစ်မင်းကို မှန်ထောင်ပြရင်း
ရနံ့တစ်ခု၏တစ်နေ့တာ
ကျောက်သားမှာ မင်ပြာနဲ့ ရေးခဲ့တယ်။ ။
[မြားနတ်မောင်။ မတ်။ ၁၉၉၉]
______________________________________________________
`` သတိရခြင်း အကြွင်း´´
သွားရမယ့်ခရီးက ဝေးလွန်းတော့
ဘယ်လို စိတ်ချနေရမလဲ
သဘာဝအပေါ် ထားရှိသောတရားတို့ မမြဲမြံနိုင်သေး
သေခြင်းက ဘယ်တော့မှ ပြန်ပေးမဆွဲဘူး ဆိုတယ်။
နောက်ကမ္ဘာမှာ သစ်ပင်တွေ ရှိသလား
ပြာဆိုတာ အဖိုးသားနား ရှိသလား
ရင်ခလောက်ဆန်အောင် ဖြစ်ရလေခြင်းများ
ပစ်စင်က ကျောက်ဆူးကို လွှတ်တင်တော့မယ်
အော်သံက မြို့ကို အခုထိ လှိုက်စားဆဲ
သေခြင်းက ဘယ်တော့မှ ပြန်ပေးမဆွဲဘူး ဆိုတယ်။
တစ်ကိုယ်မှ တစ်ကိုယ် နာအောင်ရုန်းကြရ
မခွဲခွါလို့မှ မဖြစ်ဘဲ။
နှလုံးသားလည်း
မီးပျက်ခဲ့တဲ့ စနေနေ့လို ဖြစ်ခဲ့ရပါတယ် ။ ။
[ ရနံ့သစ် ။ ဇူလိုင် ။၁၉၉၈]
______________________________________________________
`` မျှော်စင်´´
အလွမ်းနင့်အောင် မြင်ရတယ်
တိမ်တွေပြာလို့
ကောင်းကင်က ဖြူလို့
ကျီးကန်းတွေ တဝဲလည်လည် ပျံလို့
ပြီး- သစ်ရွက်တွေ တဝဲလည်လည် ကြွေလို့ ။
ဟုတ်ပြီ
လမ်းရဲ့ ရနံ့ကို မှုတ်ထုတ်လိုက်
ပြီး - အားစိုက်လို့
ဓာတ်ကြိုးများရဲ့ တွန်ကျူးသံကို ခေါင်းငုံ့ကာ စုပ်ယူလိုက်
အမှန်တကယ် ကိုယ်လုပ်ရမှာ
မီးခိုးနဲ့ နေရောင်ခြည်ကို အနံ့ခံဖို့
ပြီး- ခေါင်းလောင်းတို့ရဲ့ အသံအိုးကို စူးစမ်းဖို့ ။
ပြောစရာမရှိအောင်
အရောင်တွေက လှလွန်းတယ်
မေ့လျော့ခဲ့ရတယ်။
တစ်နေရာရာမှာ
ခြွင်းချက်များက သွား၍ တူနေပါလိမ့်မယ်။
`` နွေဦး´´တဲ့
ကျွန်တော် မဖွဲ့တတ်ခဲ့ပေါ့
ခြေစုံရပ် ရိုကျိုးခဲ့ပါတယ် ။ ။
[ သရဖူ။ ဇွန်။ ၁၉၉၇ ]
______________________________________________________
``လေမှုန်မှုန်နေ့တစ်နေ့ ´´
မြေမှာနေရတာ ညောင်းထင်ရဲ့
ရွက်ခြောက်ကြွေ လေမှာဝဲပြတော့
လက်ခေါက်ထားတဲ့ အင်္ကျီကို ပြန်လျှောချမိတယ်။
အခုတလော
နေရတာမကောင်းဘူး
ကျောခဏခဏအောင့်တယ်။
အဝေရာသီးကလေးက
ကိုယ့်အတွင်းစိတ်ကိုယ်တတွင်တွင်ခါချပြနေတော့
ဓာတ်မှန်တစ်ချပ်ကို မြေမြှုပ်သဂြုင်္ိဟ်ဖို့
ရက်ရွှေ့လိုက်ရတယ်။
ညကျ ထွက်လာမယ့် ကြယ်တွေလည်း
သဲတကျိကျိနဲ့ ဖြစ်နေမှာပဲ။
အခုတော့
ငှက်တွေတစ်ကောင်မှ မမြင်ရတော့ဘူး။ ။
[ စတိုင်သစ်။ ဒီဇင်ဘာ။ ၁၉၉၉]
______________________________________________________
`` အရာရာများ ´´
အချစ်က
ရွှေတစ်ရစ် ငွေတစ်ရစ်နဲ့ ထွန်ရေးငင်နေတဲ့အချစ်။
ခေတ်က
ကျောပိုးအိတ်ကို လွယ်ပိုးပြနေရတဲ့ ခေတ်။
တယ်လီဖုန်းက
အဝေးပြော မလွယ်ဘူး။
သစ်ပင်တစ်ပင်ရဲ့ ရာဇဝင်အကြောင်း သိကောင်းစရာ
မြေညှိစက်သို့ မပြောဖြစ်ခဲ့တော့ပါ။ ။
[ ရနံ့သစ်။ အောက်တိုဘာ။၁၉၉၈]
No comments:
Post a Comment