တစ်ခုခုကိုသတိရမိတော့ စီးကရက်ကို မီးညှိပြီးသားဖြစ်နေတယ်၊
မီးခိုးတွေကိုဖွာထုတ်ပြီး ကော်ဖီကို မော့ချလိုက်တော့ ဆံပင်တွေဟာ မီးရထားလိုရှည်တယ်၊မျက်လုံးဟာ မီးရထားသံလမ်းအတိုင်း ခရီးနှင်တယ်၊တကယ်ဆိုရင် ဆေးဆိုးပန်းရိုက်ညနယ်ဟာ ကွက်ပျစ်တစ်ခုပေါ်က လမင်းလောက် ညမပီသဘူး၊
အဲ့ဒီမှာ မိတ္ထိလာကန်ကြီးနဲ့၊ဗျိုင်းဖြူတွေနဲ့။
မျက်လုံးဟာ အဲ့ဒီမှာမရပ်ဘူး။
မျက်လုံးဟာ မြူတွေကြားထဲနစ်ဝင်သွားတယ်။
မျက်လုံးကိုငါမမြက်တော့တဲ့အချိန်ကျမှ ငါဟာ ငါ့ကိုမြင်လာတယ်၊ငါဟာ ဆုံလည်ဆိုဖာခုံမှာထိုင်ရင်း
နှီးဖျာခင်းထားတဲ့ အခန်းတစ်ခုထဲသို့ရောက်သွားတာပဲ၊နောက်တော့ငါဟာ ကော်ဖီကိုသောက်မိနေလား၊စီးကရက်ကိုရှိုက်မိနေလား ခွဲခြားမရတော့၊ငါ့နားထဲမှာကြားလာတယ်-
အို..အေ့...အေ နဲ့ အစချီတဲ့ သီချင်းတပုဒ်၊ငါမျက်တောင်ခတ်မိလိုက်သလား၊ငါ့ပါးဟာ နွေးရှရှနဲ့၊ငါမျက်ရည်ကျနေတာလား၊မျက်လုံးဟာ အဲ့ဒီမှာ ခရီးဆုံးသွားသလို စားပွဲခုံထက်က ကုန်နေတဲ့ကော်ဖီခွက်ကိုမြင်တယ်။
စီးကရက်ကို တောက်ထုတ်လိုက်တာလား၊ဝိညာဉ်ကို တောက်ထုတ်မိတာလား ဝေခွဲမရပေမဲ့ ခုနတုံးက ငါဟာ အိမ်ကိုလွမ်းနေခဲ့တာ သေချာတယ်။
K-ဒါရ
No comments:
Post a Comment