ဂျပန်မော်ဒန်ကဗျာများပေါင်းချုပ် အပိုင်း(၁)
(မြသန်းတင့်၊ သစ္စာနီ ၊ဇေယျာလင်း)
########################
အနမ်း
----------------
မျက်လုံးစုံမှိတ်လိုက်တဲ့အခါ ကမ္ဘာကြီးဟာ ထွက်သွားတယ်။
ကြင်နာမှုရဲ့ထုထည်ကသာ
ငါ့ကို ထာဝရယုံကြည်စိတ်ချစေလေရဲ့။
တိတ်ဆိတ်မှုဟာ တတ်ဆိတ်တဲ့ည ဖြစ်သွားတယ်
ငါတို့နှစ်ယောက်ကို ကတိတစ်ခုလို ၀န်းရံလို့၊
အခုချိန်မှာ ငါတို့နှစ်ယောက်ကို ခွဲခွာစေတဲ့
အရာမဟုတ်တော့ဘူး
ငါတို့ကို ၀န်းရံထားတဲ့ နူးညံတဲ့ ဝေးကွာမှုပဲ
အဲသလိုနဲ့ အမှတ်တမဲ့ပဲ ငါတို့ အထီးကျန်ကြတယ်
စကားပြောတာ ၊ ကြည့်တာထက် ပိုသေချာတဲ့ နည်းနဲ့
ငါတို့ ဖွေရှာကြတယ်
ငါတို့ကိုယ် ငါတို့ ပျောက်ဆုံးသွားကြတဲ့အခါ
ငါတို့ ဖွေရှာနေတာကို တွေ့ရှီတယ်
ငါဟာ ဘာကို ယုံကြည်စိတ်ချချင်တာလဲ၊
ဟိုး အဝေးကြီးက ပြန်လာတဲ့ ကြင်နာနွေးထွေးမှု။
သန့်စင်အောင်ပြုလုပ်ထားတဲ့ တိတ်ဆိတ်မှုထဲ
စကားလုံးတွေ ပျောက်ဆုံးလို့
အသက်ရှုနေတာက လွဲလို့ ....မင်း။
"မင်းဟာ အခုချိန်မှာ ဘ၀ကြီးတစ်ခုလုံးပါပဲ..... "
ဒါပေမယ့် ကမ္ဘာလောကထဲ ငါရှင်သန်နေထိုင်ဖို့အတွက်
ငါလိမ့်ကျပေးရတဲ့ အခုအချိန်မှာ
အဲဒီလို ပြောလိုက်ရင်တောင်မှ အပြစ်ရှိတယ်။.........။
၇ွှန်တာရို တာနီကာဝါ-ဂျပန်
ဘာသာပြန်သူ- ဇေယျာလင်း
************************************************************
လေ
******
လေဟာ
ဈာပနတစ်ခု စီတန်းလှည့်လည်သွားသလို
ငါ့ရဲ့နှလုံးသားပေါ်က ဖြတ်သန်းတိုက်ခတ်သွားတယ်။
လေဟာ
ငါ့အသည်းနှလုံးသားထဲက ပန်းပွင့်ရဲ့ရနံ့ကို
ယူဆောင်တိုက်ခတ်သွားတယ်။
လေဟာ
ငါ့လက်ထဲက ချော်ထွက်သွားပြီး
ဟိုးအဝေးကောင်းကင်ဆီက ရွေ့လျားသွားတယ်။
ကောင်းကင်ပြာပြာထဲကို
အရည်ပျော်စီးဆင်းသွားတဲ့လေဟာ
အခုထက်တိုင်အောင်
ငါ့အသည်းနှလုံးထဲမှာ တိုက်ခတ်နေဆဲပဲ။
လေ....
လေ.....
ဘယ်လိုလေလဲ။.........။
ရှန်ဂီဆူဘိုအီ(၁၈၈၉- ဂျပန် )
ဘာသာပြန်သူ-သစ္စာနီ
********************************************************************
အိမ်မက်ထဲက မိန်းမ
------------------------------
သူမကို အိမ်မက်ထဲမှာ ငါတွေ့ခဲ့တယ်
ဘယ်နှစ်ကလဲ ဘယ်ညက မက်ခဲ့တာလဲ
ငါမမှတ်မိတော့ဘူး။
(အခုတော့ သူမလည်း သေဆုံးခဲ့ပါပြီ)
ဆေးဆိုးထားတဲ့ဆံပင်နက်တွေနဲ့
ယုန်သေတစ်ကောင်လို ဖွေးဖွေးဖြူအောင်
ချယ်သထားတဲ့ မျက်နာနဲ့
သွေးလို နီရဲတဲ့ နှုတ်ခမ်းတွေနဲ့
တခြားမိန်းကလေးတွေရဲ့ အကြားမှာ
သူမ သီချင်းဆိုနေတယ်။
ရွှင်ပြတဲ့ဘင်ဂျိုတေးသွားနဲ့
မလို်က်ဖက်တဲ့ သီချင်းတစ်ပိုဒ်ကိုဆိုလို့။
ပြီးတော့ ......မီးတောက်လို တောက်လောင်နေတဲ့
အရက်သောက်လိုစိတ်နဲ့
အရက်ကို ရေလို သောက်ခဲ့တယ်
"ဘာကြောင့် မင်းရဲ့သီချင်းတွေက ရွှင်ပျနေ၇တာလဲ "
အိမ်မက်ထဲမှာ ငါမေးခဲ့တယ်။
တစ်ဝက်မူးနေတဲ့ အပြုံးနဲ့
သူမက ဖြေတယ်......
"ဒါဟာ ငိုကြွေးနေတာထက်တော့
သာသေးတယ် မဟုတ်လား ရှင်ရယ် "တဲ့။
အစ်ဟီကားဝါး-
ဘာသာပြန်သူ- သစ္စာနီ
**************************************************************
ကျောက်တုံး
-------------------
ကျောက်တုံး
တိတ်ဆိတ်ငြိမ်သက်စွာ
နှစ်ပေါင်းများစွာ
အသက်ရှင်နေထိုင်ဆဲ။
အဲဒီအတောအတွင်းမှာပဲ
ကောင်းကင်ကတော့
အခါပေါင်းများစွာ ကြည်လင်လိုက်
အခါပေါင်းများစွာ မှိုင်းအုံ့လိုက်။ ။
ဆူဘိုအီ-ဂျပန်
ဘာသာပြန်-သစ္စာနီ
*************************************************************
မျက်လုံးများ
-------------------------
အေးစက်စက် ပျက်စီးနေတဲ့မျက်လုံးတွေကို ငါလိုချင်တယ်
မေ၇မတွက်နိုင်အောင် များပြားတဲ့....
သူရဲ့မျက်လုံးတွေကို ငါလိုချင်တယ်။
တစ်ခါလောက် သူတောင်းစားအိုကြီးရဲ့မျက်လုံးတွေကို ငါလိုချင်တယ်
တစ်ခါလောက် မြင့်မြက်တဲ့လူအိုကြီးရဲ့မျက်လုံးတွေ ငါ လိုချင်တယ်
တစ်ခါလောက် ဆင်းရဲတဲ့အလုပ်သမားတစ်ယောက်ရဲ့မျက်လုံးတွေကို
ငါ လိုချင်တယ်
တစ်ခါလောက် မိန်းမလှလေးတစ်ယောက်ရဲ့မျက်လုံးတွေ ငါလိုချင်တယ်
တစ်ခါလောက် မျှော်လင့်ချက်ကင်းမဲ့တဲ့ လူတစ်ယောက်ရဲကမျက်လုံးတွေ
ငါ လိုချင်တယ်
တစ်ခါလောက် အညတရ လူငယ်တစ်ယောက်ရဲ့မျက်လုံးတွေ ငါလိုချင်တယ်
လူငယ်မျက်မမြင်တစ်ယောက်၇ဲ့ အမှတ်ရစရာတွေများတဲ့
အေးစက်စက် ပျက်စီးနေတဲ့ မျက်လုံးတွေ ငါလိုချင်တယ်။
ငါရောက်ချင်တဲ့ နေရာတွေအကြောင်းကို
ငါတွေးတောနေချင်လို့။
မစ်ဆူယို အိုယီ-ဂျပန်
ဘာသာပြန်- သစ္စာနီ
**************************************************************
အနေအထား -၃၄
------------------------
မီးတောက်လောင်နေတဲ့ မိုးကုတ်စက်ဝိုင်း
ကြီးမားတဲ့ မျက်လုံးနဲ့ တောင်တန်း
ဒိုးယိုပေါက်မြင်ရတဲ့မြို့
ပုတ်သိုးနေတဲ့ဖတ်ရှင်အရုပ်
မတ်တပ်ရပ်နေတဲ့ ဥ
နီရဲနေတဲ့လိပ်ပြာ
ပလတ်စတစ်ဇွန်း
ကွေးနေတဲ့ ပင်အပ်
အိပ်ယာပေါ်က ပစ္စတို
တွေးတောဆင်ခြင်နေတဲ့ ကြောင်
နဲ့...............................
ကြိုးတစ်ချောင်းလို ပါးလျတဲ့အရိပ်။.....။
အီချီရို အန်ဒို-ဂျပန်
ဘာသာပြန်သူ-သစ္စာနီ
*************************************************************
မွေးနေ့
-----------------
နံရံမှာ လိပ်ပြာတစ်ကောင်ကို
ငါ ပင်အပ်နဲ့ စိုက်တွယ်ထားတယ်။
သူ နည်းနည်းလေးမှ မလှုပ်ရှားနိုင်ဘူး
ငါ့ဆန္ဒက........
ငါ့ရဲ့ပျော်ရွှင်ခြင်းကိုလည်း အဲသလို
ပင်အပ်နဲ့ စိုက်တွယ်ထားချင်တာမျိုး။
စားပွဲပေါ်မှာ နွားခြံတစ်ခြံပုံစံနဲ့
နွားထီးတစ်ကောင်ရဲ့ အသားမျှင်များ၊
ပုလင်းထဲမှာ
ပုလင်းရဲ့ပုံစံနဲ့ ရေ၊
အသာအယာစွပ်လိုက်တဲ့ အ၀တ်ထဲမှာတော့
သူမရဲ့အလှနဲ့ သူမ။
ဖူယူရီ အန်ဇာအီ-ဂျပန်
ဘာသာပြန်- သစ္စာနီ
***********************************************************
ကြယ်ပွင့်နှင့် ကြွေရွက်များ
----------------------------------
တိတ်ဆိတ်တဲ့သန်းခေါင်ယံမှာ
ကြယ်ပွင့်တစ်ပွင့်
သစ်ရွက်ရော်ရီတွေနဲ့ စကားပြောနေလေရဲ့
အဲဒီတုန်းက ငါ့အနားမှာ
လေပြည်သာ လှုပ်ရှားနေတယ်
အထီးကျန်ညှိုးငယ်မှုကြောင့်
သူတို့စကားဝိုင်းကို ၀င်ဖို့
ကြိုးစားကြည့်တော့
ကြယ်ပွင့်က ကောင်းကင်ပေါ်တွေက
ငုပ်လျှိုးသွားတယ်
ရွက်ကြွေတောမှာ
ကြယ်ပွင့်ကို လိုက်ရှာပေမယ့်
ရှာလို့မတွေ့တော့ ။ ။
(ဆူဘိုအီ-ရှီ ဂိဂျီ )
မြန်မာပြန်-မြသန်းတင့်
*************************************************************************
ကမ္ဘာနှစ်ခု
-------------------
ညချမ်းကောင်းကင်မှာ
ကြယ်တစ်ပွင့်ကို ကိုယ်မြင်တော့
မင်းဆီလာပြီး ဒီကြယ်ပွင့်လေးအကြောင်းကို
ကိုယ်ပြောပြတယ်
ဒီတော့ မင်းက ပြောတယ်
ဒီကြယ်ပွင့်လေးကို မင်းလည်း မြင်တယ်တဲ့။
မှုန်ပျပျ သစ်ပင်ကိုင်းတွေပေါ်မှာ
ခိုနားဖို့ သိုက်မြုံတစ်ခုရှာနေတဲ့
ငှက်ငယ်တစ်ကောင်ကို ကိုယ်ပြေတော့
မင်းက ပြောတယ်
ဒီငှက်ငယ်ကို မင်းလည်း မြင်တယ်တဲ့။
တကယ်တော့ မင်းမြင်တဲ့ကမ္ဘာနဲ့
ကိုယ်မြင်တဲ့ကမ္ဘာဟာ
အတူတူပါပဲလား။
ကိုယ်တို့မျက်လုံးနှစ်စုံဟာ
တစ်ကိုယ်ထဲမှာ ရှိနေကြတာ မဟုတ်လား။
ဒီလိုဆိုရင်
အမြင်အားလုံးကို
မင်းဆီ ထားပစ်ခဲ့ဖို့ မဖြစ်ဘူးလား။
ကိုယ်မျက်လုံးတွေကို မှိတ်လိုက်တော့
ကိုယ့်ကမ္ဘာဟာ ရုတ်တရက် ပျောက်သွားတယ်။
ဒါပေမယ့် ဒီကမ္ဘာဟာ
မင့် မျက်လုံးထဲမှာ ဆက်တည်နေဦးမှာပါ။ ။
(ယာမာဇာကီ အီဂျီ)
မြန်မာပြန်-မြသန်းတင့်
**************************************************************
လိပ်ပြာ
--------------
စမ်းသပ်ခန်းထဲမှာ
သေနေတဲ့ငါ့ခန္ဓာကိုယ်ကို
တခြားလိပ်ပြာသေကောင်နှင့်အတူ
ဖြန့်ထားတယ်
ပင့်အပ်ကလေးတစ်ချောင်းစိုက်လို့
ဝမ်းနည်းပူဆွေးနေတဲ့
သံစုံတီးဝိုင်းတစ်ခုလို ငြိမ်သက်လို့
ပိန်ပိန်ရှည်ရှည်ပိုးမွှားဗေဒပါရဂူက
သူ့ခေါင်းကို ငုံ့ပြီး တွေးနေတယ်
ငါ့အတောင်တွေဟာ
တစ်ချက်တစ်ချက် ခတ်သွားတယ်။
“ အလို…ဒီလိပ်ပြာက မသေသေးပါလား
ဥာဏ်များတဲ့သတ္တ၀ါကလေး
လေတိုက်လို့များလား
ပိုးမွှားဗေဒပါရဂူက
ပြတင်းကို ဆောင့်ပိတ်လိုက်တယ်။
ဟုတ်တယ် ငါအသက်မရှိတော့ဘူးဆိုတာ
ငါ သိပါတယ်။
ငါဟာ စမ်းသပ်ခံ
လိပ်ပြာတစ်ကောင်ပါ
ဒါပေမယ့် ပြတင်းပေါက်ကို
အလံပိတ်ထားရင်တော့
မွန်းပြီး သေရချည်ရဲ့
ငါရဲ့
ယောင်ယမ်းစကားပြောသံကို ကြားတော့
ဇနီးသည်က အိပ်ရာက ထပြီး
ပြတင်းပေါက်ကို အသာဖွင့်လိုက်တယ်။
အပြင်ဘက်မှာတော့
ပွင့်အာလာတော့မယ့် ပန်းပွင့်တွေကို
ညက ရွှန်းလဲ့နေတယ်။
ရွှန်းလဲ့လိုက်တာမှ
မျက်ရည်တွေ ယိုစီးကျသည်အထိပါပဲ ။
(ဆူဘိုအီ-ရှီ ဂိဂျီ )
မြန်မာပြန်-မြသန်းတင့်
*************************************************************
ဝက်ဝံ
------------------
မတ်လလယ်ပေမယ့်
ဒီမနက်မှာ နှင်းတွေ မကျစဖူး ကျနေလိုက်တာ
ဘွတ်ဖိနပ်ရှည်ရှည်တွေနဲ့
နှင်းပေါ် နင်းလျှောက် တကျွတ်ကျွတ်နဲ့
ကြည့်စမ်း........ငါခြေရာတွေ ကြီးလိုက်တာ
တိုကျိုမြို့ကြီးမှာပဲ ငါဟာ ၀က်ဝံတစ်ကောင်ဖြစ်သွားတယ်။
လူသားတွေ မရှိကြတော့ဘူးလားလို့
လူသားလို့ခေါ်တဲ့ သတ္တ၀ါတွေ မရှိကြတော့ဘူးလားဗျို့။ ။
ရှီဂေဂျီ ဆူဘိုအိ-ဂျပန်
ဘာသာပြန်- ဇေယျာလင်း
********************************************************
အကုန်သက်သာသော လ
------------------------------
လကို ငါ ဘာကြောင့် စားမရတာလဲ
အဲဒါကို စဉ်းစားလို့မရဘူး။
ဆာလောင်နေတဲ့ ငါးတစ်ကောင်ဟာ
ကန်ရေထဲမှာ အရိပ်ထင်နေတဲ့ လကို
ကျွတ်ကျွတ်ဝါးရင်းပြောတယ်။
ငါ စားတာပဲ၊ စားနေတာပဲ
စားနေလျက်နဲ့ အဲဒါက ပျောက်မသွားဘူး
အံ့ရော၊ ဒါဟာ မကုန်ခန်းနိုင်တဲ့အရာလား
အံ့ရော။
ရေထဲမှာ အရိပ်ထင်နေတဲ့ လကို
ဆာလောင်စွာ တကျွတ်ကျွတ်ဝါးရင်း
ကန်ထဲမှာ ငါးဟာ ဆီမန်းသလို
တတွတ်တွတ် ပြောနေတော့တယ်။
ယိုရှီကာ နိုမူကာ-ဂျပန်
ဘာသာပြန်-သစ္စာနီ
******************************************************
ကြီးထွားခြင်း
------------------------------
အသက်သုံးနှစ်တုန်းက
ငါ့မှာ အတိတ်မရှိခဲ့ဘူး။
အသက် ငါးနှစ်မှာ ငါ့အတိတ်ဟာ မနေ့ကပဲ။
အသက်ခုနစ်နှစ်မှာ
ငါ့အတိတ်ဟာ ရှေးသူရဲ့ကောင်းတွေရဲ့ခေတ်။
အသက်ဆယ်တစ်နှစ်မှာ
ငါ့အတိတ်ဟာ ဒိုင်နိုဆောတွေဆီ။
အသက်ဆယ်လေးမှာ
ငါ့အတိတ်ဟာ ကျေင်းသုံးစာအုပ်တွေထဲမှာ။
အသသက်ဆယ့်ခြောက်မှာ
အတိတ်ရဲ့အကန့်အသတ်မဲ့ခြင်းဟာ
ငါ့ကို တုန်လှုပ်ခြောက်ခြားစေတယ်။
အသက်ဆယ်ရှစ်နှစ်မှာ
အချိန်ကာလဆိုတာ ဘာလဲ
ငါမသိတော့ဘူး။ ။
ရှီ၇ို မူရာနို (ဘာသာပြန် - ဇေယျာလင်း )
************************************************
အထီးကျန်ခြင်း
-----------------------
ကျွန်တော်
တစ်ယောက်ယောက်နဲ့
ကုတင်ပေါ်မှာ အိပ်နေတယ်
နှစ်နှစ်ခြိုက်ခြိုက်။
လက်မောင်းတစ်ဖက်ဟာ
ကျွန်တော့်ကို ခေါင်းအုံးလို အုံးဖို့
ကြင်နာစွာနဲ့ ရောက်ရှိနေတယ်။
ကျွန်တော်ကတော့
အဲဒီလက်မောင်းကို ယုယစွာကိုင်တွယ်ပွတ်သပ်လို့။
ဒီလက်မောင်းက လွဲရင်
ကိုယ်ခန္ဒာ မရှိဘူး
မျက်နာမရှိဘူး
ဆံပင်မရှီဘူး။
ဒီလက်မောင်းရှင်ဟာ ဘယ်သူလဲ
ခင်ဗျားတို့လည်း ၀ိုင်းဝန်းစဉ်းစားပေးကြပါဗျာ။.....။
အိုင်ကု တာကန်နာကာ-ဂျပန်
ဂျပန်မော်ဒန်ကဗျာများ
****************************************************************
ပင်လယ်ဇင်ယော်
---------------------------
ပင်လယ်ဇင်ယော်တစ်ကောင်ကို ငါ စောင့်ကြည်နေတယ်။
ငါ.............လှိုင်းလုံးတွေအကြားက.....
အဖော်မဲ့ပန်းတစ်ပွင့်ကို စောင့်ကြည့်နေတယ်။
အလင်းရောင်ရဲ့လျပ်တပျက်ဝင်းပမှုမျိုးလို
အပြုံးတစ်ခုလို
အချိန်ကာလတစ်ခုလို
အဆုံးအစမဲ့သံသရာလို
အထီးကျန်။အထီးကျန်ဆန်လွန်းတဲ့ပျံသန်းနေပုံကို
ငါ စောင့်စားကြည့်နေတော့တယ်။
(ဖူကူဟားယား-ဂျပန် )
မြန်မာပြန်-သစ္စာနီ
******************************************
သိုး
--------------
သမ္မာကျမ်းစာလို
ငါစားချင်လိုက်တာ
ဘယ်သူများ ကျွေးပ။
နောက်ပြောင်သလို
အိမ်သာသုံးစက္ကူကို ပေးလိုက်တော့
အို…မြင့်မြတ်တဲ့ သာဝက က
ဆင်းသက်ပေါက်ဖွားလာသူတွေ။
(အိုဆားဒါး )
မြန်မာပြန်-သစ္စာနီ
*************************************************
နှင်းဆီတစ်ပွင့်ထဲမှာ
-----------------------
နှင်းဆီတစ်ပွင့်ထဲမှာ
ဖျားလို့ တုန်နေတဲ့ မိုးကုတ်စက်ဝိုင်းရှိတယ်။
နှင်းဆီတစ်ပွင့်ထဲမှာ
တွဲလောင်းဆွဲထားတဲ့ဗျောက်အိုးရဲ့ဆူပူမှုရှိတယ်။
နှင်းဆီတစ်ပွင့်ထဲမှာ
ဂျက်လေယာဉ်ပျံရဲ့တဒီဒီးမြည်တဲ့အသံရှိတယ်။
နှင်းဆီတစ်ပွင့်ထဲမှာ
ကြောက်မက်ဖွယ်ကောင်းတဲ့ အိပ်မက်ရဲ့မြေပုံရှိတယ်။
နှင်းဆီတစ်ပွင့်ထဲမှာ
မိန်းမ၀တ်ဘောလီထဲက ထွက်လာတဲ့လက်နက်ရှိတယ်
နှင်းဆီတစ်ပွင့်ထဲမှာ
နှင်းဆီမရှိဘူး။ ။
(အရှီယို အန်ဒို )
မြန်မာပြန်-သစ္စာနီ
************************************************************
ကျောခိုင်းခဲ့သောအရာများ
-----------------------------------
ငါ့မိတ်ဆွေရဲ့မျက်နာကို ငါမေ့တယ်
ပင်လယ်ဟာ ငါးတွေကို မေ့သလိုပေါ့။
ငါ့ချစ်သူကို ငါမေ့တယ်
နွေဦးရာသီဟာ ချယ်ရီပန်းတွေကို မေ့သလိုပေါ့။
ငါ့အချိန်ကို ငါမေ့တယ်
ရေဟာ လှေတွေကို မေ့သလိုပေါ့။
ငါ့ကဗျာကို ငါမေ့တယ်
မြို့ဟာ ကြယ်တွေကို မေ့သလိုပေါ့။
ငါ့ခန္ဓာကို ငါမေ့တယ်
မိန်းမတစ်ယောက်ဟာ သူ့စိတ်ကို မေ့သလိုပေါ့။
ငါ့အိပ်မက်ကို ငါမေ့တယ်
လမင်းဟာ သူ့ရဲ့လှည့်လည်ရာခရီးဝန်းကို မေ့သလိုပေါ့။
ငါ့ဘကို ငါမေ့တယ်
ဘုရားသခင်ဟာ သူ့လူတွေကို မေ့သလိုပေါ့။
ကမ္ဘာကို ငါမေ့တယ်
သမုဒ္ဒရာဟာ တိုက်ကြီးတွေကို မေ့သလိုပေါ့။
(က၀ါအီ )
မြန်မာပြန်-သစ္စာနီ
************************************************************
ကြိုးပုခတ်ကလေး
------------------------
ပင့်ကူတစ်ကောင် ရက်လုပ်ထားတဲ့
ကြိုးပုခတ်ထဲမှာ
လိပ်ပြာတစ်ကောင်သေနေလေရဲ့ ။
ကြိုးပုခတ်ရဲ့ရွှေရောင် အ၀န်းအ၀ိုင်းထဲမှာ
လိပ်ပြာလေး သေခဲ့ရှာသတဲ့။
လိပ်ပြာလိုပဲ
မင်းအချစ်
ကြိုးပုခတ်ပေါ် ကိုယ်တက်စီးတော့
ကိုယ်လည်း သေရမယ်ထင်ပါရဲ့။
(ဟိုရီဂူချီ ဒိုင်ဂကု )
မြန်မာပြန်-မြသန်းတင့်
**************************************************************
ထိုနေရာသို့
--------------------
မင်း ဘယ်ကလာသလဲ
မျက်စိမမြင်တဲ့ ကျောက်တုံးတစ်တုံးဆီက
မဖွင့်ဟတဲ့ နှင်းဆီရဲ့နှုတ်ခမ်းများထဲက
ငါလာခဲ့တယ်။
အခု မင်း ဘယ်မှာလဲ
သေဆုံးခြင်းဆီသွားနေတဲ့ သူတွေ
အရိပ်ထင်နေတဲ့…
ရှင်သန်ခြင်းဆီကို လာနေတဲ့ သူတွေ
အရိပ်ထင်နေတဲ့…..
မှန်တစ်ချပ်ရဲ့ရှေ့မှာ ငါ ရောက်နေတယ်။
မင်း ဘယ်ကို သွားမှာလဲ
ငါ တစ်နေရာရာကို သွားနေတယ်။
ငှက်တွေရဲ့ အတောင်ပံနဲ့ မရောက်နိုင်တဲ့အရပ်
ပင်လယ်ငါးတွေ မနေထိုင်နိုင်တဲ့ အရပ်ကို ။
(ကီဟာယာ)
မြန်မာပြန်-သစ္စာနီ
#ဆရာပိုင်သစ်နွယ် facebookမှ ကူယူဖော်ပြသည်
No comments:
Post a Comment